O Concello do Porriño consolida o seu papel como motor económico da provincia grazas ao impulso da actividade empresarial e á tramitación áxil de expedientes urbanísticos. Así o vén de explicar a administración local nun comunicado no que indica que «só no que vai de 2025, a Xunta de Goberno Local resolveu 62 expedientes de implantación ou modificación de actividades económicas, facilitando a apertura de novos negocios e a adaptación de locais en sectores como a restauración, o comercio, os servizos persoais e a pequena industria«.
Estas solicitudes abranguen desde restaurantes, locais de hostalaría ou tendas de roupa, ata salóns de peiteado ou pequenas industrias, «permitindo iniciar ou modificar o uso dun espazo para o desenvolvemento dunha actividade económica».
Este dinamismo administrativo enmárcase nun contexto económico sólido: máis de 2.200 empresas activas, máis de 3,5 millóns de metros cadrados de solo industrial ocupado e un dos PIB máis altos da provincia, «cifras que poñen de manifesto a forte estrutura empresarial do municipio e a súa capacidade para atraer e reter investimento», tal e como apuntan desde o Concello do Porriño.
Un departamento colapsado desde os anos 90
O alcalde, Alejandro Lorenzo, subliña que «estes datos demostran que O Porriño é un concello que acompaña a quen quere emprender, con seriedade e axilidade administrativa. Queremos facilitar que se poñan en marcha proxectos sen atrancos burocráticos innecesarios».
Pola súa banda, a concelleira de Urbanismo, Promoción e Xestión de Vivenda, Medio Ambiente e Mercados, Antía Carrera, lembra que «o departamento estaba colapsado e moitos expedientes de actividades levaban bloqueados desde os anos 90. Hoxe estamos a resolver esa situación e a poñer o foco no desenvolvemento económico local».
