A Área Recreativa Muíño da Ponte, na parroquia de Corzáns en Salvaterra de Miño, será a encargada de acoller durante os días 9, 10 e 11 de maio toda a programación que ten preparada a Asociación Quinta do Piñeiro para a XVII Sementeira e Música 2025.
Esta ano, que contará cun día máis de festa que en anteriores edicións, o pregoeiro será o humorista e acto Luís Zahera, quen dará o pregón, con posterior monólogo, ás 13:30h dende o escenario Electricidad Condado.
A festa dará comezo o venres 9 de maio cunha xornada inclusiva adicada ao Colexio Rural Agrupado A Lagoa de Salvaterra de Miño e ás asociacións de persoas con discapacidade ADAPTA e Avelaíña, de Ponteareas.
Durante a xornada, os usuarios e usuarias poderán desfrutar de actividades deseñadas exclusivamente para eles na Área Recreativa Muíño da Ponte.
De seguido, o sábado día 10 de maio, terá lugar a concentración de tractores polas rúas da vila con diversas paradas ao longo do seu percorrido ata chegar á Área Recreativa Muíño da Ponte, onde estarán expostos durante toda a find de semana. Dende a asociación recordan que as inscricións para participar na concentración de tractores estarán abertas ata o 1 de maio.
No lugar do evento, haberá durante toda a fin de semana postos de artesanía, grupos e actuacións musicais, actividades para os máis cativos, demostracións agrícolas e postos gastronómicos, ademais das tradicionais olimpíadas agrícolas.
Así, durante a xornada do sábado 10 de maio, actuarán os grupos Terapia de Grupo, Os Varacuncas, Pakolas, La Duendeneta, Son das Tabernas, A Banda da Loba, Dakidarría e Storrentos.
O domingo 11 de maio, que será o último día da festa, será a quenda de Naiama, As Lucernas, Fanfarría Faruxa, Festicultores e Catuxa Salom.
A alcaldesa de Salvaterra, Marta Valcárcel, asegurou que «é unha honra ver como esta festa vai crecendo pouco a pouco, unha festa que pon en valor as nosas tradicións» e agradeceu «a todas aquelas persoas que fan posible este evento, e en especial a Asociación Quinta do Piñeiro, que poñen todo o seu traballo e esforzo para que sexa realidade».
Dende a Asociación Quinta do Piñeiro lembran que xa están á venda as camisetas desta nova edición, que se poderán adquirir reservándoa a través do número de teléfono 637 76 48 65, nos locais de Salvaterra de Miño: Cerralleiro O Remendón, Petisq’eira e A Cantinera ou o propio día da festa.
