O Concello de As Neves celebrou hoxe un pleno extraordinario no que se aprobou por unanimidade o inicio do procedemento de licitación do Servizo de Axuda no Fogar (SAF), «unha medida clave para garantir a continuidade e a calidade deste servizo esencial para moitas persoas do municipio», segundo indican desde a administración local.
O SAF é unha prestación básica dirixida a mellorar a calidade de vida das persoas en situación de dependencia, ofrecendo atención no propio fogar para favorecer a súa autonomía e permanencia no entorno familiar e comunitario.
Consenso
Desde o goberno municipal valorouse «moi positivamente o consenso acadado entre todas as forzas políticas con representación plenaria, destacando o compromiso común coa atención ás persoas máis vulnerables do concello».
Esta licitación permitirá renovar e adaptar o servizo ás necesidades actuais, reforzando o apoio ás familias e ás persoas maiores ou dependentes que fan uso deste recurso social.
O Concello reafirma así o seu compromiso cun «modelo de coidados centrado nas persoas, transparente e sostible, que asegure un acompañamento digno e profesional para quen máis o necesita».
