Galicia non pode afirmar aínda se chegou xa ao pico de contaxios desta sexta vaga. Os datos das últimas xornadas perfilan unha "contención" tras unha baixada tamén nos hospitais pero Feijóo anunciou que será para a semana cando o comité avalíe os datos e decida aliviar ou non as restricións vixentes.

O presidente da Xunta:

Na súa comparecencia tras a reunión semanal do Consello da Xunta, Feijóo dixo hoxe que será a vindeira semana cando o comité clínico se reúna para avaliar a situación epidemiolóxica actual para poder afirmar que Galicia acadou xa o pico desta sexta vaga ou non.  A previsión era que o pico se acadase a terceira ou cuarta semana de xaneiro.

En función das conclusións dos expertos, o Goberno galego decidirá se alivia as restricións actuais ou non.

"No caso de que o xoves vexamos que se produce o pico e a diminución (de casos) é constante e notoria tomaremos unha decisión para deixar sen efecto parte ou todas as mínimas restricións que impuxemos no Nadal. Cremos que hai que ser prudentes e non aprobar por decreto a gripalización do virus. Imos ser prudentes pero se se confirma o pico actuaremos en consecuencia", dixo Feijóo.