O seguimento da folga sanitaria a nivel nacional convocada contra o Estatuto Marco promovido polo Goberno central, na quenda de tarde deste mércores, foi do 4,29 % nos centros sanitarios da comunidade galega, segundo a Consellería de Sanidade.
Así, a porcentaxe de participación nos sete grandes hospitais do Servizo Galego de Saúde, na quenda de tarde acadou o 4,57 %. En canto aos hospitais comarcais, non se rexistrou seguimento do paro. No seu conxunto, a actividade hospitalaria contou cunha participación na folga do 3,77 %.
Pola súa banda, no que respecta á atención primaria o seguimento da folga en rexeitamento do borrador presentado polo Ministerio de Sanidade acadou o 5,09 % de participación.
Por centros hospitalarios
Por centros hospitalarios, o paro foi secundado polo 4,39 % no caso do Complexo Hospitalario Universitario da Coruña; o 5,48 % no caso do Hospital Universitario Lucus Augusti; o 10,23 % no Complexo Hospitalario Universitario de Ourense; o 10,53 % no Complexo Hospitalario Universitario de Pontevedra; o 1,74 % no Complexo Hospitalario Universitario de Vigo; e no caso do Complexo Hospitalario Universitario de Santiago de Compostela e do Complexo Hospitalario Universitario de Ferrol non houbo seguimento.
En canto ao seguimento en atención primaria na quenda de tarde por áreas sanitarias foi o seguinte: área sanitaria da Coruña e Cee, 2,76 %; área sanitaria de Santiago de Compostela e Barbanza, 1,82 %; área sanitaria de Ferrol, 5,56 %; área sanitaria de Ourense, Verín e O Barco de Valdeorras, 14,75 %; área sanitaria de Pontevedra e O Salnés, 4,44 %; na área sanitaria de Vigo, do 8,40 %; e na área sanitaria de Lugo, A Mariña e Monforte de Lemos a convocatoria de folga non contou con seguimento na xornada de tarde.
Pola súa banda, en entidades sanitarias como son a Axencia Galega de Doazón de Sangue, Órganos e Tecidos (ADOS), a empresa pública de servizos sanitarios Galaria e a Fundación Pública Urxencias Sanitarias de Galicia-061 o seguimento na quenda de tarde acadou o 2,5 %.
O Servizo Galego de Saúde conta na xornada de hoxe coa cobertura do 100 % dos servizos mínimos, garantindo a actividade asistencial urxente e de emerxencias.
