O Diario Oficial de Galicia (DOG) vén de publicar a orde da Consellería de Emprego, Comercio e Emigración pola que abre a partir deste 27 de marzo o prazo de adhesión dos establecementos comerciais para a iniciativa dos Bonos activa comercio.
Ao igual que na edición anterior, aqueles comercios que se sumen dende hoxe á campaña, non terán que volver a facelo para todas as vindeiras edicións deste ano 2026.
Tras o éxito acadado nas anteriores convocatorias, a Xunta impulsará de novo este ano os Bonos activa comercio, de xeito coordinado co sector e cun crédito inicial de 2,5 millóns de euros. O obxectivo, segundo aseguran dende o goberno galego, “é seguir incentivando a demanda comercial e axudando economicamente ás persoas consumidoras, ao tempo que se fomentan as compras nos establecementos comerciais retallistas participantes”.
A apertura do prazo de adhesión dos negocios é o paso previo antes da súa activación á cidadanía, cuxos prazos se establecerán nas correspondentes ordes de cada unha das edicións do programa. Como vén sendo habitual, os bonos estarán dispoñibles en formato dixital na web www.bonosactivacomercio.gal.
