Os barrios de A Feira e Castro Barreiro, enfrontados dende hai máis de 130 anos, saíron este martes de entroido dende os seus respectivos torreiros cara ao centro da Esfarrapada para locer os seus traxes e carrozas.
A choiva non freou o desfile de entroido en Salceda de Caselas, aínda que sí o ameazou. Momentos antes da saída das comitivas, a choiva facía acto de presenza nos torreiros de ambas comparsas protagonistas, que decidiron sair a desfilar de igual xeito.
A sorpresa chegou cando ambas comparsas comezaron a aproximarse ao centro da vila onde se concentraba a maior parte do público, pois a temática de ambas era a mesma, o universo do artista español Gaudí. Os espectadores miraban atónitos, xa que exceptuando que aconteceu exactamente o mesmo o ano pasado, facía máis de 30 anos que non se recordaba un feito así.
A primeira en entrar na Esfarrapada foi A Feira, presidida polo famoso lagarto que Guadí deseñou para o Park Güell de Barcelona. Tras ela, Castro Barreiro recorreu a mesma rúa, tamén co íconico lagarto multicor en primeiro lugar. Casualidade ou non, os compoñentes de ambas comparsas bailaron e desfrutaron cun público entregado e unhas rúas ateigadas.
Finalmente, o desfile rematou coas tradicionais coplas e piques entre ambos barrios.
