A Xunta amplía a alerta laranxa activada por temporal costeiro na Coruña e Pontevedra a todo o litoral galego, coa incorporación da Mariña. Ademais, mañá a alerta elévase a vermella no litoral noroeste e oeste da Coruña a partir das 21,00 horas. Co fin de garantir a seguridade dos bens e as persoas, a Dirección Xeral de Emerxencias e Interior, da Consellería de Presidencia, Xustiza e Deportes, informou da situación a través do Centro Integrado de Atención ás Emerxencias 112 Galicia aos concellos das provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros.
Segundo a Axencia Estatal de Meteoroloxía (Aemet), o fenómeno meteorolóxico adverso afecta hoxe a todo o litoral galego con mar combinada do noroeste con ondas de ata seis metros e, ocasionalmente, de sete metros. A partir das 21,00 horas de mañá, na costa noroeste e oeste da Coruña agárdase mar combinada con ondas de ata nove metros e vento do noroeste de ata forza sete. No resto do litoral manterase a alerta laranxa.
Debido á alerta laranxa, a Secretaría Xeral para o Deporte da Consellería de Presidencia, Xustiza e Deportes anunciou a suspensión da actividade deportiva no mar, tanto federada como do programa Xogade, nos concellos afectados segundo as previsións dos órganos preditores, e que se poden consultar na web Deporte Galego.
A Xunta lembra a importancia de manterse afastado da liña de costa, isto é, diques, rompentes e paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións. Aconséllase consultar a páxina web do CIAE 112 (www.axega112.gal), que conta con información meteorolóxica e con ligazóns de interese.
