A Zona Franca de Vigo continúa avanzando no proxecto do futuro HUB Audiovisual e explora en Barcelona novas vías de colaboración de cara á súa posta en marcha. Unha delegación do Consorcio e do Concello de Vigo visitou o HUB XRLAB Palo Alto, un centro de referencia internacional en innovación e emprendemento audiovisual.
Este espazo, impulsado polo Concello de Barcelona en colaboración co sector empresarial, destaca polo seu modelo de xestión público-privada e pola súa aposta polos contidos dixitais de última xeración, aspectos que serven de referencia para o HUB vigués, concibido como un polo estratéxico para a industria audiovisual da Eurorrexión Galicia–Portugal.
O delegado do Estado na Zona Franca, David Regades, subliñou que o obxectivo do proxecto é impulsar a competitividade do sector audiovisual, atraer investimento e talento e xerar emprego de calidade. Pola súa banda, a primeira tenente de alcalde de Vigo, Carmela Silva, destacou a capacidade da cidade para liderar unha iniciativa deste tipo, apoiada no seu potencial tecnolóxico e na súa traxectoria no ámbito audiovisual.
Por outra banda, a Zona Franca pechou recentemente a Consulta Preliminar ao Mercado para testar o interese na xestión do futuro HUB Audiovisual de Vigo, á que concorreron un total de sete operadoras. As propostas presentadas serán analizadas de cara ao deseño final do proxecto e á súa posterior licitación.
