O Comité de Ence-Pontevedra cifra o seguimento da folga nun 100%: «A fábrica está paralizada»

O comité de empresa de ENCE denuncia a «imposición» por parte da compañía dun escenario de «ruptura total» co diálogo na fabrica de Pontevedra, e o inicio formal dun Expediente de Regulación de Emprego (ERE) que o traslada a Madrid cos demais centros de traballo.

Celébrouse onte a primeira reunión marcada pola «mala fe» da dirección, polo que o persoal mantén o seguimento total da folga, e a fábrica atópase «totalmente parada«, segundo indican desde o Comité de Empresa.

Omar Vázquez, de Comisións Obreiras e secretario do comité de empresa, afirmou que «a compañía pretende forzar un despedimento colectivo sen garantías legais». Subliñou que os sindicatos non podían «responder doutra maneira ante a ameaza directa dun despedimento colectivo» e que o persoal manterá a unidade para defender «cada posto de traballo».

Proceso «irregular«

O Comité asegura que o proceso estivo marcado en todo momento pola «mala fe da empresa», por «ameazas, chantaxes ao persoal», e intentos de desconvocar a folga. Denunciaron «presións constantes ao comité para forzar a aceptación do despedimento colectivo fóra dos leitos legais».

A dirección de ENCE, tal e como denuncia o Comité de Empresa, nega o acceso a información relevante e tentou impoñer unha comisión irregular de negociación, que ten o «único fundamento de restarlles defensa e representación no proceso legal». Ademais, a empresa impuxo servizos mínimos abusivos e difundiu «información falsa» entre o persoal, mentres introducía «ameazas sobre unha posible perda de máis postos de traballo ou o peche da fábrica».

O comité criticou que ENCE incumpriu «reiteradamente os compromisos adquiridos tras obter a seguridade xurídica para continuar en Pontevedra». Os sindicatos sinalan que os investimentos anunciados non chegaron, que o plan «Pontevedra Avanza» está «paralizado», e que mesmo se incumpriu pactar en materia de seguridade e saúde laboral. Advertiuse ademais dos «recortes en servizos auxiliares, que xeran condicións insalubres e inseguras a pesar dos requirimentos da Inspección de Traballo».

Respecto ao chamado «plan de competitividade» da empresa, o comité considérao un «plan de incompetencia total disfrazado de competitividade«. Este plan non responde a «melloras produtivas nin tecnolóxicas, senón a unha redución directa de persoal». Vázquez criticou que a empresa queira xustificar os despedimentos en custos salariais que representan «unha porcentaxe ridícula non custo de produción». A posición da dirección de necesitar despedimentos para «obter caixa coa que realizar investimentos» foi cualificada polo Comité de Empresa como un «auténtico despropósito».

Temor por operación corporativa

O Comité expresou a súa preocupación polas visitas de directivos de Altri ás instalacións de Pontevedra e Navia (Asturias). Este feito incrementa o temor a unha operación corporativa que «vaia acompañada dunha redución previa de persoal». O conflito tamén afecta as empresas auxiliares e aos transportistas, que tampouco «están a ser escoitados pola compañía».

CCOO, UGT e CIG instan as administracións públicas, especialmente á autonómica, a que «fagan valer os compromisos asumidos» en materia de emprego, investimento e continuidade industrial. Os sindicatos esixen que se obrigue a ENCE a respectar «o prometido».

O Comité reitera que non renuncian a ningún posto de traballo e fan un chamamento á sociedade e ás institucións para apoiar un «conflito que consideran determinante para o futuro industrial da comarca».