Decembro chega con moi boas novas a Salvaterra de Miño. A vila milenaria acolle, como é habitual, durante a primeira fin de semana do mes de decembro a Festa do Viño Espumoso, que nesta edición dá un paso máis alá e se transforma oficialmente na Festa do Espumoso Galego.
Este cambio de denominación chega da man da Consellería do Medio Rural, a través da Axencia Galega da Calidade Alimentaria (AGACAL), co obxectivo de impulsar e dar visibilidade ao sector elaborador de viños espumosos producidos en Galicia.
A festa celebrarse os días 5, 6 e 7 de decembro no recinto amurallado de Salvaterra de Miño, un espazo emblemático que volverá acoller unha gran carpa destinada aos principais protagonistas: os viños espumosos galegos. Alí, as adegas participantes ofrecerán as súas mellores creacións, acompañadas de tapas, doces e cafés, nun espazo que combina a enoloxía, a gastronomía e a boa música.
O obxectivo é apostar pola diversificación, innovación e posta en valor dos viños galegos, reforzando a súa presenza tanto nos mercados interiores como nos exteriores. Deste modo, Salvaterra convértese durante tres días no escaparate perfecto para os viños espumosos elaborados baixo as denominacións de orixe e indicacións xeográficas protexidas galegas.
A programación completarase con actuacións musicais e outras propostas culturais que animarán a celebración ao tempo que se poñen en valor os viños espumosos da comarca e de toda Galicia.
