Unha muller resultou ferida esta mañá en Monterrei ao caerlle enriba unha árbore mentres realizaba tarefas de corta de leña nunha zona de monte en Flariz, segundo indican desde Emerxencias de Galicia.
O 112 Galicia tivo constancia do suceso ás 11:50 horas, a través do aviso do Servizo de Urxencias Sanitarias de Galicia-061, que informaba de que a muller permanecía ferida e atrapada baixo a árbore.
De inmediato, activouse un operativo no que participaron os Bombeiros de Verín, que, ao chegar ao punto, comprobaron que a vítima xa fora liberada por particulares, prestando apoio aos servizos sanitarios nas tarefas de atención e asistencia.
Ademais, desde o 112 Galicia tamén se informou á Garda Civil e aos efectivos de Protección Civil da localidade para colaborar co dispositivo de emerxencia.
