O pleno extraordinario que vén de celebrar o Concello de Ponteareas co obxectivo de tratar a situación das traballadoras do Servizo de Axuda no Fogar non serviu para desconvocar a folga indefinida. Os argumento do goberno municipal (PP, ACIP e Independentes de Ponteareas) non convenceron ao SAF da vila do Tea porque, segundo explicaron, «estades olvidando o máis importante, que son as traballadoras».
O encargado de poñer voz á postura do goberno municipal foi o edil de Facenda, Francisco Jesús Represas, quen indicou que «non imos agardar ao proceso adminsitrativo para solventar os problemas do SAF» e que «se a empresa continúa sen cumplir, abriremos entón ese expediente sancionados». Pola súa banda, as traballadoras indicaron que «xa non están cumprindo» e criticaron que «o Concello está salvando á empresa mentres os estades olvidando de nós».
Ao carón de Represas, a edil de Benestar Social, Raquel Plana, non interveu na sesión plenaria, pero si escoitou unha das traballadora do SAF de Ponteareas, quen, con bágoas nos ollos, achegouse á bancada do Partido Popular para reclamar que «por favor, solucionada isto, estamos nunha situación crítica».
A tensión foi en aumento durante a celebración do pleno extraordinario. As traballadoras tomaron a palabra en máis dunha ocasión para denunciar que levan xa máis de 19 días en folga e que «queremos traballar para vivir». Sinalaron que «non se trata de estar politizadas, somos nós as que estamos sen cobrar» e pediron que «non nos tratades como tontas dicindo que estamos facendo isto porque nos convenceron, temos iniciativa propia».
Pola súa banda, a alcaldesa, Nava Castro, insistiu hoxe que «non imos a municipalizar o servizo, polo menos con este goberno» o que terminou coa paciencia das traballadoras do SAF, que abandonaron o salón de plenos porque «non nos estades escoitando».
As traballadoras do Servizo de Axuda no Fogar continuarán en folga indefinida.
