Como parte da programación da Feira dos Remedios, o sábado 6 de setembro os veciños e visitantes poderán participar en diferentes catas-degustación gratuítas ‘Experiencias de Calidade’, unha iniciativa da Axencia Galega da Calidade Alimentaria (AGACAL), dependente da Consellería do Medio Rural da Xunta de Galicia.
A primeira delas será unha cata-degustación de mel de Galicia, de 12:00 a 12:30 horas, e estará presentada por Beatriz Ríos, técnico do Consello Regulador da IXP Miel de Galicia. A continuación, de 12:45 a 13:30 horas, o sumiller Nacho Costoya realizará unha cata de viños brancos premiados nas Catas de Galicia 2024. A última actividade da mañá será de 13:45 a 14:30 horas, cunha cata-degustación de produtos de artesanía alimentaria, e estará presentado por Alejandro Martínez, presidente da Sociedade Cooperativa Condado de Paradanta.
Pola tarde, as actividades comezarán ás 16:30 horas, momento da cata de augardentes e licores tradicionais de Galicia, que presentará Sonia Otero, membro do Consello Regulador dos Augardentes e Licores Tradicionais de Galicia. De 17:30 a 18:15 horas, Óscar Ramil, director técnico do Consello Regulador da DOP Arzúa- Ulloa dinamizará a cata-degustación ‘Irmáns de leite (Queixos galegos con denominación de orixe protexida)’. Estas ‘Experiencias de calidade’ rematarán coa última cata, de 18:30 a 19:30 horas, neste caso de viños tintos premiados nas catas de Galicia 2024, presentada polo sumiller Nacho Costoya.
Para asistir, só será necesario inscribirse nos postos de AGACAL situados na feira.
