O Concello de Vigo inicia os trámites para implantar a taxa turística na cidade. Así o vén de anunciar o alcalde Abel Caballero nunha conferencia de prensa na que indicou que «creo que é bo que desde o sector turístico se contribúa ao benestar da cidade«. En todo caso, será un proceso «dialogado», segundo explicou o rexedor.
Caballero indicou que mantivo xa dúas reunións coa asociación que aglutina aos hosteleiros de Vigo, Ahosvi, e explicou que a iniciativa partiu destes representantes do sector. Con todo, aínda non está decidida a coantía desa taxa turística que «a normativa galega fixa como tope nos 2,50 euros» polo que «haberá que decidilo en función do establecementos», destinguindo entre pensións, hoteis ou apartamentos turísticos.
A taxa afectará ás case 5.000 prazas hoteleiras que existen na actualidade na cidade e ás 11.000 vivendas turísticas. Tamén aos cruceiristas. O alcalde Abel Caballero explicou que «a recadación non será significativa nos orzamentos, pero é bo que se achegue ao benestar da cidade desde o sector turístico». Avanzou que «será unha taxa razoable» para Vigo.
