Soutomaior vén de anunciar dous concertos cos que os veciños e as veciñas así como as persoas que se acheguen ata este municipio poderán desfrutar do segundo sábado do mes de xullo. Trátase das actuacións de The Rapants’ e Rebeliom do Inframundo, dous dos grupos máis recoñecidos na actualidade dentro do panorama musical galego. A cita coa música terá lugar no Peirao de Arcade.
Concerto The Rapants en Soutomaior
A xornada, que será totalmente de balde, comezará ás 21:30 horas cunha sesión DJ de ‘A Duendeneta’. Ás 22:00 horas dará inicio o concerto de ‘The Rapants’, grupo orixinario de Muros que vén de encher esta mesma semana a Cidade da Cultura en Santiago de Compostela.
Rebeliom do Inframundo en Soutomaior
Xa a media noite, sobre as 00:00 horas será a quenda do grupo vigués ‘Rebeliom do Inframundo’, con máis de 10 anos de experiencia e «un habitual do panorama festivaleiro en Galicia», segundo explican desde o Concello.
Zona gastro
Aos dous concertos, que serán abertos ao público e de balde, sumarase unha zona gastro para que as persoas asistentes poidan comer e beber sen ter que desprazarse do lugar das actuacións, así como unha serie de actividades complementarias que terán lugar durante o transcurso dos concertos.
Horarios do concerto de The Rapants e Rebeliom do Inframundo
- 21:30h: Sesión DJ de ‘A Duendeneta’
- 22:00h: Concerto de ‘The Rapants’
- 00:00h: Concerto de ‘Rebeliom do Inframundo’
O alcalde de Soutomaior, Manu Lourenzo, sinalou que “estes concertos son unha nova mostra da aposta que fai o Goberno local pola promoción e difusión do galego en todos os ámbitos. Tamén demostra que este Goberno programa para os públicos de todas as idades e que ten en conta todos os gustos”.
Lourenzo engadiu que «ter unha axenda de actividades tan completa e extensa como a de Soutomaior ao tempo que realizamos a maior cantidade de investimentos da historia do noso concello é posible grazas a unha xestión económica que rompe todas as previsións».
Para concluír, o alcalde convidou a que “todas e todos vos acheguedes este sábado ata o Peirao de Arcade. Non só para escoitar a mellor música do País, senón que para descubrir todo o que ten por ofrecer esta paraxe natural tan espectacular como é o final da Ría de Vigo, con praias a menos de 5 minutos a pé da zona dos concertos, unha oferta de restauración de gran calidade e un moi bo ambiente para todas as idades”.
