O Tribunal Superior de Xustiza de Galicia (TSXG) suspendeu de forma cautelar a resolución da Xunta de Galicia que reactiva a caza do lobo na tempada 2024/2025. A Sala adopta esta decisión ao entender que a medida do Goberno galego «podería afectar á viabilidade das poboacións».
O alto tribunal galego, que aplicou o principio de precaución ambiental, accedeu á medida cautelar solicitada por WWF-ADENA , organización que presentou un recurso contencioso-administrativo contra a resolución da Xunta do pasado 3 de abril que permite autorizar a caza de lobos cando existan «danos constatados desta especie».
Xestión do lobo en Galicia
No auto, o TSXG explica que as medidas de xestión do lobo da resolución buscan «previr e paliar» os danos á gandería. Con todo, recalca que «non se ofrece información nin cualitativa nin cuantitativa» sobre estes danos e que, aínda que «non son reversibles, si son indemnizables».
Polo tanto, ao ponderar entre a protección da viabilidade das poboacións de lobo e eses danos na gandería, o tribunal aplicou o principio de precaución ambiental e accedeu a paralizar de maneira cautelar a resolución.
Para «coñecer o estado de conservación» das poboacións de lobo ao norte do Douro, a Sala remite a un informe da Comisión Europea publicado en 2024, que «representa un retroceso na poboación total». Tamén acode aos datos do censo do lobo ibérico en Galicia 2021-2022 elaborado pola Xunta, no que se observa que «o incremento, limitado, de mandas prodúcese na maioría das áreas compartidas», con Castela e León, Asturias ou Portugal. Os restantes incrementos, salvo na área de Lugo, con tres mandas, non son «significativos», engade.
Á espera da resolución final
Os maxistrados advirten que o incidente cautelar «non pode anticipar o sentido da resolución final do litixio no que atende ao fondo do debate». Tamén lembran que, conforme a xurisprudencia do Tribunal de Xustiza da Unión Europea, «o principio de precaución se impón tanto na área concernida pola resolución como na avaliación extensa, que integra a áreas limítrofes, pero tendo que ser favorable o estado das poboacións en ambos escenarios e non só nun deles». E engaden que, polo momento, existen «indicios consistentes» de que hai unha «cualificación desfavorable respecto do estado das poboacións».
En calquera caso, inidican nun comunicado que «a resolución que paraliza o TSXG só se aplica á tempada de caza 2024/2025, que remata o 31 de xullo«.
A Xunta insiste en que os datos son “verdadeiros”
Dende a Xunta, a conselleira de Medio Ambiente, Ángeles Vázquez, dixo que estudarán o auto do Tribunal Superior de Xustiza de Galicia pero insistiu en que os datos que presentou a Xunta son «verdadeiros«.
«Acabamos de coñecelo, imos estudalo e haberá que concretar», sinalou este mércores en declaracións a xornalistas , nas que recordou que a rebaixa da protección do lobo foi apoiada tanto pola Unión Europea como polo Congreso dos Deputados.
Vázquez insistiu en que hai uns datos «que están rexistrados» , cunha media diaria de dez mortes de gando que «está comprometendo a viabilidade de varias explotacións» e de patrimonio cultural como os potros de A Capelada. E engadiu que «en ningún caso se compromete a viabilidade da poboación de lobo» , que se incrementou ata as 93 mandas, un número «superior ao de Portugal e ao de Francia».
