O Concello do Porriño vén de anunciar o segundo dos cinco recoñecementos que serán entregados este sábado na II edición dos Premios Antonio Palacios. Trátase do Premio ao Compromiso Social, que este ano será outorgado ao Círculo Recreativo Cultural CRC.
Este recoñecemento pon en valor a dilatada traxectoria do CRC como referente no ámbito social e cultural do municipio. Ao longo dos anos, o Círculo consolidouse como un espazo de encontro e dinamización que promove a participación cidadá, o lecer e a cohesión comunitaria.
O seu «labor constante no fomento de valores como a colaboración, a solidariedade e o servizo á comunidade fan desta entidade unha merecida gañadora do galardón., un espazo que ten sido un motor para o fomento da cultura, do lecer e da cohesión comunitaria, promovendo valores de colaboración e servizo ao municipio» aseguraba o rexedor local do Porriño, Alejandro Lorenzo.
O Premio Antonio Palacios ao Compromiso Social busca distinguir a aquelas persoas ou entidades que destacan polo seu labor desinteresado a prol do ben común, reforzando o tecido social e contribuíndo á mellora da calidade de vida no Porriño.
Lorenzo, aseguraba que “todos no Porriño temos algún recordo ligado ao CRC. É moito máis ca unha entidade cultural; é unha parte da nosa historia e do noso día a día. Levan anos abrindo as portas á veciñanza, creando comunidade e facendo barrio. Este premio é unha maneira de dicirlles gracias, de corazón, polo que representan para todos nós.”
O acto de entrega da II edición dos Premios Antonio Palacios celebrarase este sábado nunha gala que reunirá a diversas personalidades do mundo da cultura, da empresa, do deporte e da sociedade civil, así como representantes da comunidade local.
