O subdelegado do Goberno en Pontevedra, Abel Losada, copresidiu xunto coa alcaldesa de Ponteareas, Nava Castro, a Xunta Local de Seguridade na que se coordinou o dispositivo especial das festas do Corpus Christi, que terán lugar os días 21 e 22 de xuño e que prevén acoller a unhas 50.000 persoas. Esta celebración, declarada de Interese Turístico Internacional, é unha das máis importantes da provincia e ocupa boa parte do centro urbano da localidade.
Na xuntanza tamén participou o tenente da Garda Civil de Ponteareas, Santiago Rodríguez, a xefa da Unidade de loita contra a Violencia sobre a Muller da Subdelegación do Goberno, María José Rodríguez, e a xefa da Policía Local, Patricia Fernández, entre outras autoridades e mandos policiais. Losada amosou a súa satisfacción polo “clima de colaboración total, que é a maneira de avanzar”.
Centro, lecer e feira
Así, durante a reunión definíronse tres zonas principais de actuación coordinada entre a Garda Civil e a Policía Local para garantir a máxima seguridade do evento: a zona urbana de actividade principal, a zona de lecer nocturno e a zona das atraccións de feira. O dispositivo de seguridade prevé todas as continxencias e riscos e inclúe a instalación dun posto de mando avanzado.
Entre as novidades deste ano destaca a posta en marcha dun punto violeta virtual, que complementará o punto físico habitual. Este novo recurso consiste nun adhesivo con código QR que permite acceder a información sobre todos os recursos dispoñibles en caso de sufrir ou presenciar unha situación de violencia machista.
Cifras de delincuencia
A Xunta Local de Seguridade tamén avaliou as cifras de delincuencia do primeiro trimestre de 2025, nas que se mantén a tendencia á baixa: rexistráronse 212 infraccións penais fronte ás 233 do mesmo período de 2024, o que supón un descenso do 9,01%. “Ponteareas é un concello moi seguro”, subliñou o subdelegado.
Tamén se deron a coñecer os datos do Plan Director para a Convivencia e a Mellora da Seguridade nos Centros Educativos, desenvolto pola Garda Civil neste municipio. No primeiro trimestre do ano celebráronse 58 sesións informativas, incluíndo dúas charlas para familias nas que participaron 79 proxenitores. As actividades chegaron a 1.806 estudantes e 109 docentes, o que supón un importante incremento respecto ao ano anterior.
Violencia de Xénero
En canto á violencia de xénero, a xefa da Unidade de loita contra a Violencia sobre a Muller da Subdelegación do Goberno, María José Rodríguez, informou da existencia de 66 casos activos no municipio. Deles, 52 contan con orde de protección: hai 12 casos non apreciados, 37 con risco baixo, 17 medio, 2 alto e 1 caso extremo, cuxo autor foi detido recentemente.
Polo seu lado, a alcaldesa de Ponteareas, Nava Castro, aproveitou a ocasión para felicitar ao subdelegado do Goberno en Pontevedra, Abel Losada, pola inclusión do municipio nas visitas da furgoneta VIDOC da Policía Nacional, que permite expedir o DNI e o pasaporte. O vehículo xa estivo operativo en Ponteareas con moi bos resultados e gran demanda.
