O alcalde de Vigo, Abel Caballero, anunciou que a cidade acenderá as súas luces de Nadal o sábado 19 de novembro, un día antes que en 2021.
A chamativa celebración do Nadal, da que o rexedor vigués está moi orgulloso, chega este ano marcada pola polémica sobre a súa oportunidade nun momento de crise enerxética e cos prezos da luz polas nubes.
Máis aló do debate, Caballero defende un plan para aforrar electricidade con dous eixos: uso de luces de baixo consumo e limitación de horario de aceso con respecto a edicións pasadas.
«O Nadal no planeta empeza o 19 de novembro, porque o punto de partida márcao Vigo», reivindicou o rexedor este luns en rolda de prensa. Entre os cambios previstos para este ano, Vigo atrasará o aceso diario da súa iluminación do Nadal media hora, mentres que adiantará o seu apagado tamén media hora. Desta maneira, as luces estarán acendidas seis horas no canto de sete como no Nadal pasado.
