jueves, marzo 28, 2024
InicioComarcasLouriñaJorge Coira e Ian Gibson, no Festival de Cans

Jorge Coira e Ian Gibson, no Festival de Cans

O director de cine recollerá este venres o premio Pedigree e deixará a súa pegada no torreiro das estrelas, onde o historiador británico manterá un coloquio sobre o filme “Donde acaba la memoria”

Jorge CoiraO Festival de Cans entrega mañá venres os seus premios de honra. O director Jorge Coira, a veciña de Cans e acordeonista Marisol González, e o actor Tamar Novas, subirán, ás 21.30 horas, ao escenario do Espazo Estrella Galicia da Leira do Río para recoller os galardóns. A entrega dos premios chegará logo dun longo día de actividades. Mañá venres, o público tamén poderá falar co hispanista Ian Gibson no Torreiro de Cans sobre o documental ‘Donde acaba la memoria’, asistir á retrospectiva de curtas do director brasileiro Kleber Mendonça Filho, ou presenciar a estrea da longametraxe ‘9 fugas’, do director vigués Fon Cortizo. O día acabará co concerto de Maika Makovski.

A Noite das Homenaxes é tan emblemática coma entrañable no Festival de Cans. A Asociación Cultural Arela, organizadora do certame, recoñece cada ano co Premio Pedigree, o seu máximo galardón, a traxectoria e achegas ao cinema e ao sector audiovisual dun profesional. É o caso de Jorge Coira neste 2021. Ademais de recibir o premio, o tamén director de ‘Eroski Paraíso’, deixará pegada a súa estrela no Torreiro ás 21.30 horas.

Cos Chimpíns de Prata, Arela premia a persoas que destacan polo seu apoio á celebración do Festival ou pola promoción e difusión do mesmo. O Chimpín de Prata Divina Campos é este ano para a veciña de Cans e acordeonista Marisol González, un referente na aldea e unha das almas do tradicional roteiro sonoro de Cans. Ademais é compositora xunto ao profesor Álex Balbuena de dúas pezas musicais que xa son un himno en Cans: “A Felisiña” e “Acuque de Cans”. O actor Tamar Novas recibirá o Chimpín de Prata Pepe Puime por xogar un imprescindible papel de apoio ao Festival no sector cinematográfico e nas redes sociais.

Coloquios

Ian GibsonO coloquio que o historiador británico Ian Gibson manterá co público de Cans no Torreiro é outra das citas máis agardadas do Festival este ano. Estará precedido -na noite de hoxe xoves- pola proxección de ‘Donde acaba la memoria’, a película de Pablo Romero-Fresco na que Gibson volve a Las Hurdes detrás dos pasos de Luis Buñuel.

Moito antes, ás 10 da mañá, celébrase o primeiro dos catro coloquios e conversatorios sobre diferentes temas relacionados co cinema que se celebrarán mañá venres no Baixo de Carlos. Será o Café con CREA, no que baixo o título «Labitis, a febre Lab» catro realizadores falarán sobre a nova febre dos ‘laboratorios’ de filmes en construción. Participan Guillermo García López, Jaione Camborda, Álvaro Gago, e a israelí Inbar Horesh.
O segundo dos conversatorios da mañá será o «Diálogo interxeracional» que manterán, dentro dos Coloquios AISGE, os actores galegos Tamar Novas e Celso Bugallo. O actor pontevedrés, cuxas interpretacións en filmes coma ‘Los lunes al sol’ ou ‘Mar adentro’ son inesquecibles, acaba de publicar as súas memorias.

Xa ao mediodía, e na sección ‘A qué andas?’, cinco cineastas presentarán os seus proxectos de guión. Pola tarde, será o tempo dos ‘Fillxs de Cans’: realizadores que dende os inicios das súas carreiras están vencellados ao Festival, falarán dos seus vindeiros proxectos. Participan Alfonso Zarauza, Nuno Beato, Marcos Nine, Andrés Goteira e Jaime Camino.

Cinema

Ás 18.00 horas, no Baixo de Bugarín, chega a estrea en salas do filme “9 Fugas”, de Fon Cortizo. Na película, e a partir da sinfonía improvisada por unha orquestra, cóntanse nove historias. A cinta xa pasou por festivais coma o de Shangai e foi premiada no FicXixón. Antes da proxección, Lar Legido, un dos músicos que participan na longametraxe, fará unha performance de percusión pola aldea. Comezará no Torreiro e chegará ao Baixo de Bugarín para comezar a proxección.

A partir das 20.30 horas, e tamén no Baixo de Bugarín, poderá verse a retrospectiva de curtametraxes do director brasileiro Kleber Mendonça Filho. O realizador estará presente nas proxeccións, coas que se completa a retrospectiva da súa obra. A semana pasada, no Centro Cultural Municipal do Porriño, proxectáranse as súas longametraxes. Mendonça Filho manterá un diálogo co público de Cans este sábado ás 12 horas no Espazo Estrella Galicia da Leira do Río.

Concertos

A xornada rematará co primeiro dos grandes concertos do XVIII Festival de Cans, o de Maika Makovski. A cantante mallorquina interpretará temas do seu último álbum, ‘MKMK’, e tamén algunhas das súas cancións máis coñecidas. Makovski, cantante seguida por unha inmensa minoría, tamén é cinemna. Combina a súa propia carreira musical coa composición de bandas sonoras para filmes. Tamén presenta na canle La 2 de TVE o programa ‘La Hora Musa’

ARTIGOS RELACIONADOS

+ POPULAR

COMENTARIOS RECENTES