O uso de máscara na rúa deixará de ser obrigatorio en Portugal o luns 13 de setembro. A lei deixará de estar en vigor este domingo e non hai propostas para renovala.
A maioría dos partidos, incluído o gobernante Partido Socialista, xa comunicaran publicamente que non ían propoñer a renovación da lei.
A medida estaba en vigor desde finais de outubro de 2020 e obriga a usar máscara na rúa sempre que non sexa posible manter a distancia social aconsellada
. A principal autoridade sanitaria do país, a Dirección Xeral de Saúde (DGS), mostrouse a favor do fin da medida, aínda que segue recomendando o seu uso en determinadas situacións onde o risco de contaxio de coronavirus é maior, como eventos, aglomeracións ou nos recreos das escolas.
«Cada un debe, a pesar de todo, seguir levando encima unha máscara e en caso de necesidade debe colocarlla», dixo a directora xeral de Saúde, Graça Freitas.